असार १७, बाँके । बाँकेका वरिष्ठ पत्रकार डा. प्रसाद धिताल भारतको नयाँ दिल्लीमा सम्मानित हुनुभएको छ । दिल्लीस्थित क्राउन प्लाजामा आयोजना गरिएको एक कार्यक्रममा डा.धिताललाई अन्तर्राष्ट्रिय उत्कृष्ट आइकन अवार्ड २०२४ बाट सम्मानित गरिएको हो ।

प्रेस सेन्टर नेपालका केन्द्रिय सदस्य तथा गुड न्यूज राष्ट्रिय साप्ताहिकका प्रधान सम्पादक डा. धिताललाई कार्यक्रमका प्रमुख अतिथि प्यालेस्टाइनका राजुदुत सन्दिप महरुवा र विशेष अतिथि भारतीय मुख्य डिजाइनर आस्मा गुल्जार र पदम श्री सुन्त्याले संयुक्त रुपमा सम्मान गर्नुभएको थियो । 

ब्राण्डम्यान नामक संस्थाले आयोजना गरेको सो कार्यक्रममा पत्रकारिता क्षेत्रमा महत्वपूर्ण भुमिका खेलेको भन्दै बायोटाको आधारमा छनोट गरेर नेपालबाट डा. धिताललाई सम्मान गरिएको संस्थाका अध्यक्ष अंकित कौशिकले बताउनुभयो । उहाँका अनुसार डा. धिताललगायत भारतका विभिन्न क्षेत्रमा योगदान पुर्‍य ाएका ३२ प्रान्तका ६९ जनालाई पनि सो समारोहमा सम्मान गरिएको थियो ।

प्यालेस्टाइनका राजदुत महरुवाले कार्यक्रममा बोल्दै राम्रो उत्कृष्ट काम गरेर समाजका लागि उदाहरण बन्ने व्यक्तित्वहरुलाई सम्मान गर्न पाउनु गौरवको कुरा भएको बताउनुभयो । त्यस्तै भारतका मुख्य फेसन डिजाइनर गुल्जारले ब्रान्डम्यानले विभिन्न क्षेत्रमा उल्लेखनीय काम गर्ने व्यक्तिहरुलाई सम्मान गर्दै आएको जनाउँदै यो महत्वपूर्ण काम जारी राख्न आग्रह गर्नुभयो । 

कार्यक्रममा बोल्ने अधिकांश वक्ताहरुले पछिल्लो समयमा नागरिक समाजका अगुवाहरुमा देश, समाज र समुदायका लागि केही गरौं भन्ने भावना वृद्धि हुँदै गएकोमा सन्तोष व्यक्त गरेका थिए ।