जाजरकोट । छेडागाड नगरपालिकाले आयोजना गरेको पाचौं मेयर कप तथा राष्ट्रपति रनिङ्गशिल्ड प्रतियोगिता २०८१ को उदघाटन भएको छ । कर्णाली प्रदेशका आर्थिक मामिला तथा योजना मन्त्री राजिब बिक्रम शाहाको प्रमुख आतिथ्यतामा सोमबार कार्यक्रमको उदघाटन भएको हो ।

कार्यक्रममा प्रदेश मन्त्रालयका सचीव पुष्पराज शाही, जिल्ला समन्वय समितिका प्रमुख काली बहादुर खत्री, छेडागाडका उपप्रमुख  चन्द्र बहादु थापा, छेडागाडका पुर्ब मेयर लालबहादुर महतारा, एमाले नेता खिम बहादुर शाही १३ वटै वडाका वडा अध्यक्षहरुको आतिथ्यता रहेको थियो । यस्तै कार्यक्रममा पालिका भित्रका १५ वटा माध्यमिक विद्यालयका प्र.अ., खेलाडी र सर्वसाधारणको उपस्थिति रहेको थियो ।

कार्यक्रमका प्रमुख अतिथिलाई स्थानीय बाजागाजा सहित नगर प्रमुख रत्न बहादुर खड्काले स्वागत गरेका थिए । राष्ट्रको लागि खेलकुद स्वास्थका लागि खेलकुद भन्ने मुल नाराका साथ सुरु भएको कार्यक्रममा अतिथिहरुलाई स्वागत मन्तव्य द्वारा स्वागत छेडागाड नगर पालिकाका निमित्त प्रमुख प्रशासकीय अधिकृत दिपक शाहीले गरेका थिए । 

कार्यक्रमको संचालन जनप्रिय मा.बि. का प्र.अ. जय बहादुर थापाले गरेका थिए । प्रमुख अतिथि मन्त्री शाह कार्य ब्यस्तताको कारणले हेलिकप्टर चाटर गरेर आएका थिए । कार्यक्रमको सुरुमै बोल्दै मन्त्री शाहले आफु सेवा गर्नेगरि जाजरकोट आएकोले जनताको सेवामा अहोरात्र खटिने प्रतिबद्धता जनाए ।

आफ्नो निर्वाचन क्षेत्रको कार्यक्रम भएकोले अरु कामलाई थाति राखि हेलिकप्टर चाटर गरेर आएको उनले बताए  । साथै नगर अस्पताल पनि कानुनी बाधा फुकाएर छिट्टै संचालनमा ल्याउने र धरमपोखरा देखि कचाली सुयाडा बाट आउने बाटो पनि छिट्टै पक्की बनाउने बताए ।