काठमाडौँ l नेपाली कांग्रेसका महामन्त्री गगनकुमार थापाले कांग्रेसबाटै ऊर्जामन्त्री भएका दीपक खड्कालाई नेपाल विद्युत प्राधिकरणका कार्यकारी निर्देशक कुलमान घिसिङलाई हटाउने काममा नलाग्ने सुझाव दिएका छन्।

सिन्धुलीमा आयोजित पार्टीको कार्यक्रमलाई सम्बोधन गर्दै थापाले एक व्यक्तिविरुद्ध सरकार नै लाग‍ेको जस्तो देखिएकोले त्यस्ता काममा नलाग्न खड्कालाई निर्देशन दिएका हुन्। 

‘अहिले हामी सुनिरहेका छौँ, ऊर्जा मन्त्रालयको। मन्त्रालयअन्तर्गत विद्युत् प्राधिकरण छ। मैले बुझ्न सकेको छैन, बदनियत हो कि ढंग नपुगेको हो,' उनले भने, 'तीन–चार महिनामा सेवा निवृत्त हुने एउटा व्यक्तिपछि सरकार नै लागेको देखिन्छ। यस्ता कुरा ठिक होइन। यस्तो, नचाहिने काममा कोही पनि मन्त्रीहरू लाग्नु हुँदैन।'

थापाले सेवा निवृत्त भएपछि उक्त ठाउँमा उपयुक्त व्यक्तिलाई ल्याएर संस्थाको जिम्मा दिन पनि खड्कालाई सुझाए। मन्त्रीहरूले नचाहिने काम गर्दा सच्याउने काम प्रधानमन्त्री केपी शर्मा ओलीको भएको थापाको भनाइ छ। ‘प्रधानमन्त्रीले राम्रो कामको श्रेय पनि पाउँछ, नराम्रो कामको अपजस पनि लिनुपर्छ। हामीहरू सहयोगी हौँ,' थापाले भने, 'सबैको कुरा एउटै छ, सरकारले राम्रो काम गरोस्, सफल होस्। प्रदेशको सरकारको सन्दर्भमा पनि त्यही हो।’ नेपालखबर