माघ २६, काठमाडौं । वीर अस्पतालले ट्युमरबारे विशेषज्ञ र बिरामीसँग अन्तरक्रिया कार्यक्रम सुरु गरेको छ । बिहीबारबाट नाक, कान तथा घाँटी विभागले यस्तो कार्यक्रम सुरु गरेको ईएनटी सर्जन डा. रिकेश ठाकुरले जानकारी दिए ।

उनका अनुसार नाक, कान तथा घाँटीमा देखिने जटिलखालका टयुमरबारे छलफल गर्न दुई सातामा एकपटक बिहीबारका दिन बैठक बस्नेछ । त्यहाँ नाक, कान तथा घाँटीका विशेषज्ञ, रेडियसन अंकोलोजिस्ट, मेडिकल अन्कोलोजिस्ट र प्याथोलोजिस्टसहितका विशेषज्ञ बसेर जटिल ट्युमरबारे छलफल गरिनेछ ।

‘यो बैठकमा जटिल केसको कुन पद्धतिबाट कसरी उपचार गर्दा राम्रो नतिजा आउँछ भनेर विज्ञहरुसँग छलफल हुन्छ । त्यति मात्र होइन बिरामीलाई पनि बैठकमा राखेर समस्या र उपचार कसरी बढाउने भनेर अन्तरक्रिया गरिन्छ,’ डा. ठाकुरले भने ।